GhoenasKraal
het gedurende 1994 hulle eerste opleidingskursus vir wildplaaswerknemers
aangebied, gedryf deur 'n behoefte wat deur die destydse Transvaal Wildvereniging
geïdentifiseer is. Van 'n nederige begin met 'n jaggidskursus in
tydelike-gehuurde fasiliteite en sonder enige hulpmiddels, het die sentrum
gegroei en beskik dit vandag oor eie geboue en fasiliteite wat 32 kursusgangers op
'n keer kan huisves, voltydse onderigpersoneel, sewe verskillende kursusse wat
aangebied word en 'n trotse rekord van vêr oor die100 opleidingskursusse en meer
as 1500 wildplaas- werknemers wat reeds kursusse bygewoon het.
GhoenasKraal
Opleidingsentrum is groot dank verskuldig aan die Noordelike Wildboer
Organisasie,
en dan veral aan twee voormalige voorsitters van die organisasie, Dr Dirk
Neethling en wyle Jimie Malan, vir hulle ondersteuning oor die jare.
Alhoewel GhoenasKraal Opleidingsentrum onafhanklik opereer, is daar vandag steeds
noue samewerking tussen die sentrum en die verskillende georganiseerde
wildbedryfstrukture, en dan veral tussen die sentrum en die Noordelike Wildboer
Organisasie.
Prof Piet du Plessis PhD MCom, 'n bekende en
aktiewe lid van verskeie bedryfsorganisasies wat die natuurlike wildlewe van ons
land dien en ook 'n voormalige voorsitter van die Suid-Afrikaanse
Wildboerorganisasie, is die direkteur van GhoenasKraal Opleidingsentrum.
Dit is grootliks aan sy ywer en insette te danke dat die sentrum oor die jare
gegroei het en steeds 'n gehalte en behoefte-gerigte diens aan die wildbedryf
lewer.
Cornel du Plessis MSc, bygestaan deur Niel du
Plessis BSc, koördineer die verskillende kursusse en is ook verantwoordelik vir
die aanbieding van die meeste lesings. Hulle word bygestaan deur kundiges
soos Prof Theuns Eloff, Drs David Grossman, Wilhelm Schack, Dirk Neetling, Andrew
van Zyl en Tertius Bergh, Mnr Lampies Lambrecht en andere. Die betrokkenheid van
soveel kundige persone by die onderskeie kursusse verseker dat die gehalte van
die onderrig absoluut hoogstaande is!
GhoenasKraal Opleidingsentrum besef hoe groot die
behoefte na opleiding in die wildbedryf is en aanvaar ook dat hulle, met hul beperkte
vermoë, nie alleen in hierdie behoefte kan voorsien nie.
